Askofu Ruzoka akikabidhi kituo cha afya Kaliua majengo yenye thamani ya shilingi 700,000,000

-


Askofu Mkuu wa Jimbo Kuu Katoliki Tabora Mhashamu Paulo Ruzoka hivi karibuni amekabidhi majengo mapya katika kituo cha afya Kaliua yenye thamani ya shilingi milioni mia saba (700,000,000) ikiwa ni juhudi ya kumkomboa mwanadamu dhidi ya adui maradhi.
Akikabidhi majengo hayo mapya Askofu Mkuu Ruzoka amesema Kanisa Katoliki linashirikiana na Serikali ya Tanzania katika juhudi za kumkomboa mwanadamu dhidi ya maradhi ili aweze kujipatia maendeleo kwa wakati, na kwa mantiki hiyo Jimbo Kuu Katoliki Tabora limeendelea kukuza maendeleo kwa kutoa huduma za afya, elimu, maji safi na salama na nyanja zingine za kijamii.
Askofu Mkuu Ruzoka amewaagiza waganga na wauguzi wa kituo hicho cha afya kutunza miundo mbinu yote ya kituo na kutoa huduma yao kwa weledi ili huduma iende sambamba na miundo mbinu mipya iliyokabidhiwa.
Pia Askofu Mkuu Ruzoka aliwataka waganga na wauguzi kulenga zaidi watu wa kipato cha chini katika kuwapa huduma bora akinukuu maneno toka mwinjili Matayo kuwa chochote mlichomtendea mmoja wa hao wadogo mlinitendea mimi.(Mt.25:31-46)
Baadhi ya majengo mapya aliyoyabariki na kukabidhi ni jengo la wagonjwa wa nje yaani (OPD) , wodi ya wakina mama, wodi ya wanaume, wodi ya watoto, wodi ya wakina mama wajawazito na chumba cha kuhifadhia maiti (mortuary), vyote vikiwa na thamani ya shilingi milioni 700 za kitanzania.
Akitoa mahubiri yake katika Misa Takatifu ya kukabidhi majengo hayo, Askofu Mkuu Paulo Ruzoka ameiomba Serikali kuhakikisha inatoa ulinzi wa watanzania na mali zao ili Kanisa lipate mazingira rafiki ya kumletea maendeleo mtanzania, kwani pasipo na amani hakuna maendeleo yoyote yanayoweza kufanyika.
Aidha Askofu Mkuu Ruzoka ametoa wito kwa waamini wote kutumia kituo hicho cha afya ili kuboresha afya zao na kupuuza baadhi ya watu wanaowagiribu watu wasitumie huduma za afya kwa kisingizio cha Mungu peke yake kuwaponya bila msaada wa huduma za kitabibu.
Naye Katibu wa afya Jimbo Kuu Tabora padri Alex Nduwayo akitoa taarifa yake amesema kuwa kituo bado kina changamoto kama vile uchakavu wa baadhi ya majengo kama vile chumba cha upasuaji, vifaa tiba nakadhalika.
Mganga Mkuu wa mkoa wa Tabora aliyetoa salamu kwa niaba ya Serikali amepongeza juhudi zilizofanyika kuboresha miundo mbinu hiyo na kuahidi kuongeza wahudumu katika kituo cha afya na kuwapa changamoto ya kuangalia upya huduma za kituo hicho hasa upande wa mama na mtoto ili kupunguza rufaa za hospitali jirani ya wilaya ya Urambo.
Kituo cha afya Kaliua kilianzishwa kama zahanati tarehe 2.7.1962 na aliyekuwa Askofu Mkuu wa Jimbo Kuu Tabora Hayati Marko Mihayo chini ya usimamizi wa masista wa Grail. Mwaka 1971 kituo kilichukuliwa na Serikali na watumishi wote kulipwa mishahara na serikali, ambapo tarehe  15.8.1997 Serikali ilikabidhi kituo kwa Jimbo Kuu Tabora chini ya uongozi wa Hayati Askofu Mkuu Mario A. Mgulunde na shirika la masista wa Mabinti wa Maria walianza kutoa huduma  mpaka leo hii.
Jimbo Kuu Katoliki Tabora limetekeleza mradi huu kwa ushirikiano na Baraza la Maaskofu Katoliki Italia (CEI).  Hafla hiyo ilihudhuriwa pia na Mbunge wa Kaliua Mh.Magdalena Sakaya , mwakilishi wa Mkuu wa wilaya ya Kaliua, na mwakilishi wa Mkurugenzi wa Kaliua.

Kituo hicho cha afya kinatarajiwa kupanda hadhi na kuwa Hospitali hivi karibuni.



Comments

Post a Comment

Popular posts from this blog

SALA YA ASUBUHI:SALI HIVI..

-
SALA YA ASUBUHI. Kwajina la Baba na la Mwana na la Roho Mtakatifu. Amina. Ee Baba yetu Mungu mkuu, Umenilinda usiku huu. Nakushukuru kwa moyo, Ee Baba, Mwana na Roho. Nilinde tena siku hii, Niache dhambi, nikutii. Naomba sana Baba wee, Baraka zako nipokee. Bikira safi, Ee Maria Nisipotee nisimamie. Mlinzi mkuu malaika wee, Kwa Mungu wetu niombee Nitake nitende mema tu, Na mwisho nije kwako juu. Amina. NIA NJEMA. Kumheshimu Mungu wangu Namtolea roho yangu, Nifanye kazi nipumzike Amri zake tu nishike Wazo, neno, tendo lote Namtolea Mungu pote Roho, mwili chote changu, Pendo na uzima wangu Mungu wangu nitampenda, Wala dhambi sitatenda. Jina lako nasifia, Utakalo hutimia. Kwa utii navumilia Teso na matata pia. Nipe, Bwana, neema zako Niongeze sifa yako. Amina. SALA YA MATOLEO. Ee Yesu, kwa mikono ya Bikira Maria, na kwa maungano na sadaka yako kuu, ninakutolea sala, matendo, masumbuko na furaha zangu zote za leo. Ee Yesu, ufalme wako utufikie. BABA YETU. Baba yetu uliye mbinguni, jina
Read more

Ujio wa Wamisionari wa Kwanza Tanzania Bara (2)

-
Image
Na Charles Rwehumbiza UINJILISHAJI BAGAMOYO NA TANZANIA KWA UJUMLA Kutokea Bagamoyo, wamisionari wa Shirika la Roho Mtakatifu waliweza kuendelea kuinjilisha sehemu mbalimbali za Tanzania kama vile Mhonda (Morogoro), Mandera (Morogoro), Kilema Kibosho (Moshi) na Kondoa, n.k. Kutokana na ugumu wa watu wa Bagamoyo kukubali Injili na uamuzi wa wamisionari wenye asili ya Uholanzi kuhamia Morogoro mjini.  Bagamoyo iliachwa kwa kipindi kirefu bila huduma za mapadri au wakiwa wanapata  huduma ya Misa Takatifu  mara moja kwa mwezi. Jambo hili lilisababisha ukuaji wa Kanisa la Bagamoyo kuwa duni sana hadi mwaka 1992 padri mwafrika wa kwanza alipoingia na kuweka makazi ya kudumu Bagamoyo.  Padri huyu wa kwanza mwafrika kuinjilisha Bagamoyo sio mwingine ila Padrei Valentine Bayo wa Shirika la Roho Mtakatifu. Tangu aingie Bagamoyo, Padri Bayo chini ya usimamizi wa shirika lake, ameweza kuipa Bagamoyo hadhi iliyo nayo leo hii. Hakika haitakuwa vibaya kumwita Padri Bayo “ Baba wa Uinjilish
Read more

HISTORIA YA SHEREHE YA MOYO MTAKATIFU WA YESU

-
Image
  Na Philip Komba Utangulizi:   Ibada ya Moyo Mtakatifu wa Yesu ni moja ya ibada zinazojulikana sana katika Kanisa Katoliki. Ibada hii inauona Moyo wa Kibinadamu wa Yesu kama mwakilishi wa Mapendo yake ya Kimungu kwa wanadamu , na Kanisa nayo inaiona kama Mapendo na Huruma ya Yesu kwa wanadamu wote. Ibada ya Moyo Mtakatifu wa Yesu imefikia hatua hii tunayoishuhudia leo kutokana na maelekezo ya Mtakatifu Margareta Maria Alakok aliyejifunza uendelezaji wake wakati alipokuwa anatokewa na Yesu kwa mfululizo kati ya mwaka 1673 na mwaka 1675. Mtawa mwingine tena, Mwenyeheri Maria wa Moyo Mtakatifu (1863-1899), kutoka Chama cha Kitawa cha Mchungaji Mwema huko Ujerumani, aliisisimkia sana ibada hii baada ya kuwa na mazungumzo ya ana kwa ana na Yesu na akawahi hata kumwomba Papa Leo XIII, autolee ulimwengu wote kwa Moyo Mtakatifu wa Yesu kama alivyotumwa na Yesu. Wakati wa kipindi cha enzi ya kati, watangulizi wa ibada hii mpya, walijitokeza kutoka sehem
Read more