SIKUKUU YA UBATIZO WA MKOMBOZI WETU YESU KRISTO

-

Katika maadhimisho ya Siku kuu ya Ubatizo wa Bwana, Mwinjili Mathayo anamwonesha Yesu akiwa mtoni Yordani kati kati ya wadhambi! Akiwa amejipanga mstarini ili kupata Ubatizo wa toba uliokuwa unatolewa na Yohane Mbatizaji ambaye alitaka kumkataza Yesu asibatizwe naye, lakini, Yesu akang’an’ania, ili kuweza kuwa ni daraja linalomuunganisha Mungu na binadamu! Yesu anamua kubatizwa ili kutimiza haki yote, yaani kutekeleza mpango wa Mungu kwa ajili ya ukombozi wa mwanadamu, kwa njia ya utii na mshikamano na binadamu mdhaifu na mdhambi; njia ya unyenyekevu na utimilifu wa uwepo wa karibu wa Mungu kwa watoto wake wapendwa!
Haya yamesemwa na Baba Mtakatifu Francisko wakati wa Sala ya Malaika wa Bwana, Jumapili, tarehe 8 Januari 2017 kwenye Uwanja wa Kanisa kuu la Mtakatifu Petro mjini Vatican. Yesu Kristo alipokuwa anabatizwa, mara ikasikika sauti kutoka mbinguni ikisema, “Huyu ni mwanangu mpendwa wangu, ninayependezwa naye” na mara Roho Mtakatifu kwa mfano wa hua, akamshukia kama mwanzo wa utekelezaji wa utume wake wa wokovu kwa binadamu; utume ambao unamwonesha Yesu kama Mtumishi mnyenyekevu na mpole aliyevikwa nguvu ya ukweli kama anavyosema Nabii Isaya kwamba, hatalia, wala hatapaza sauti yake, mwanzi uliopondeka hatauvunja, wala utambi utokao moshi hatauzima; atatokeza hukumu kwa kweli. Baba Mtakatifu anakaza kusema, mtindo wa maisha ya Mmissionari ambaye ni Mtume wa Yesu ni kutangaza Injili kwa upole na uthabiti bila kiburi, majivuno au kuwalazimisha watu. Utume wa kweli kamwe haufumbatwi katika wongofu wa shuruti, bali kwa njia ya ushuhuda wenye mvuto na mashiko kwa Kristo na Kanisa lake; kwa njia ya muungano thabiti na Kristo Yesu, unaofumbatwa katika sala; Ibada na matendo ya huruma kwa Kristo Yesu anajionesha kati ya ndugu zake wadogo na wanyonge. Huu ni mwaliko wa kumfuasa na kuiga mfano wa Kristo mchungaji mwema na mwenye huruma! Kwa njia ya neema, Wakristo wanahamasishwa kwa njia ya maisha yao ya furaha kuwa ni mwanga unaoangazia mapito yanayowaelekeza katika matumaini na upendo.
Baba Mtakatifu Francisko anaendelea kufafanua kwamba, Siku kuu ya Ubatizo wa Bwana inawafanya waamini kung’amua uzuri wa kuwa ni watu waliobatizwa, yaani wadhambi waliokombolewa kwa njia ya neema ya Kristo na kuingizwa katika kazi ya Roho Mtakatifu inayowafanya kuwa ni ndugu zake Kristo kwa njia ya Baba wa milele kwa kupokelewa katika Tumbo la Mama Kanisa na hivyo kujenga udugu usiokuwa na mipaka wala mwisho! Bikira Maria, awasaidie Wakristo kutunza dhamiri hai inayotambua Ubatizo na kuendelea na safari ya wokovu iliyoanzishwa kwa njia ya Sakramenti ya Ubatizo, mwanzo mpya wa maisha ya Kikristo!
Baada ya Sala ya Malaika wa Bwana, Baba Mtakatifu aliwaalika waamini pamoja na watu wote wenye mapenzi mema kusali kwa ajili ya kuwaombea wazazi na watoto 28 aliowabatiza wakati wa Siku kuu ya Ubatizo wa Bwana. Amewakumbuka na kuwaombea wazazi wanaowaandaa watoto kwa ajili ya Ubatizo au ambao tayari wamekwisha wabatiza. Anawaombea Roho Mtakatifu ili waweze kuishi Sakramenti ya Ubatizo katika imani na furaha. Baba Mtakatifu pia anawaalika waamini kuungana pamoja naye katika Mtandao wa Utume wa Sala unaosambaza nia zake kila mwezi hata kwa njia ya mitandao ya kijamii, ili kujenga na kudumisha umoja wa Kanisa kwa njia ya Utume wa Sala. Kwa vijana waliopokea Sakramenti ya Kipaimara wanakumbushwa kwamba, huu si mwisho wa maisha yao kwa kuanza kubweteka, bali ni mwanzo wa maisha ya Kikristo, changamoto ya kutoka kifua mbele kutangaza na kushuhudia furaha ya Injili!
Na Padre Richard A. Mjigwa, C.PP.S.
Idhaa ya Kiswahili ya Radio Vatican.

Comments

Post a Comment

Popular posts from this blog

SALA YA ASUBUHI:SALI HIVI..

-
SALA YA ASUBUHI. Kwajina la Baba na la Mwana na la Roho Mtakatifu. Amina. Ee Baba yetu Mungu mkuu, Umenilinda usiku huu. Nakushukuru kwa moyo, Ee Baba, Mwana na Roho. Nilinde tena siku hii, Niache dhambi, nikutii. Naomba sana Baba wee, Baraka zako nipokee. Bikira safi, Ee Maria Nisipotee nisimamie. Mlinzi mkuu malaika wee, Kwa Mungu wetu niombee Nitake nitende mema tu, Na mwisho nije kwako juu. Amina. NIA NJEMA. Kumheshimu Mungu wangu Namtolea roho yangu, Nifanye kazi nipumzike Amri zake tu nishike Wazo, neno, tendo lote Namtolea Mungu pote Roho, mwili chote changu, Pendo na uzima wangu Mungu wangu nitampenda, Wala dhambi sitatenda. Jina lako nasifia, Utakalo hutimia. Kwa utii navumilia Teso na matata pia. Nipe, Bwana, neema zako Niongeze sifa yako. Amina. SALA YA MATOLEO. Ee Yesu, kwa mikono ya Bikira Maria, na kwa maungano na sadaka yako kuu, ninakutolea sala, matendo, masumbuko na furaha zangu zote za leo. Ee Yesu, ufalme wako utufikie. BABA YETU. Baba yetu uliye mbinguni, jina ...
Read more

Ujio wa Wamisionari wa Kwanza Tanzania Bara (2)

-
Image
Na Charles Rwehumbiza UINJILISHAJI BAGAMOYO NA TANZANIA KWA UJUMLA Kutokea Bagamoyo, wamisionari wa Shirika la Roho Mtakatifu waliweza kuendelea kuinjilisha sehemu mbalimbali za Tanzania kama vile Mhonda (Morogoro), Mandera (Morogoro), Kilema Kibosho (Moshi) na Kondoa, n.k. Kutokana na ugumu wa watu wa Bagamoyo kukubali Injili na uamuzi wa wamisionari wenye asili ya Uholanzi kuhamia Morogoro mjini.  Bagamoyo iliachwa kwa kipindi kirefu bila huduma za mapadri au wakiwa wanapata  huduma ya Misa Takatifu  mara moja kwa mwezi. Jambo hili lilisababisha ukuaji wa Kanisa la Bagamoyo kuwa duni sana hadi mwaka 1992 padri mwafrika wa kwanza alipoingia na kuweka makazi ya kudumu Bagamoyo.  Padri huyu wa kwanza mwafrika kuinjilisha Bagamoyo sio mwingine ila Padrei Valentine Bayo wa Shirika la Roho Mtakatifu. Tangu aingie Bagamoyo, Padri Bayo chini ya usimamizi wa shirika lake, ameweza kuipa Bagamoyo hadhi iliyo nayo leo hii. Hakika haitakuwa vibaya kumwita Padri Bayo ...
Read more

MJUE MTAKATIFU MARIA GORETTI

-
Image
Mt Maria Goreti alizaliwa mwaka 1890,Oktoba 16,huko Corinaldo,Ancona nchini Italia.Baba yake ambaye alikuwa mkulima,aliiamishia familia huko Ferrier di Conca,karibu na Anzio.Akafa baada ya kuugua malaria.Mama yake alifanya kazi nyingi kumudu familia.Wakati mama yake,kaka na dada zake wakienda shambani,yeye aliachwa nyumbani akipika,kusafisha nyumba na kumwangalia mdogo wake aliyeitwa Teresa.Japo familia ilikuwa maskini,lakini bado walimwamini Mungu. Mwaka 1902,Julai 5,jirani yao aliyeitwa Alessandra,alijaribu kumbaka Mtakatifu Maria Goreti.Maria alipiga yowe na kumwambia mbakaji,Hiyo ni dhambi,Mungu hapendi.Akasema pia kuwa yu tayari kufa kuliko kufanya dhambi ile.Alessandro alitoa kisu,akamchoma Maria mara 14,Sehemu mbalimbali .Hakupata msaada wowote mpaka mama yake,na ndugu zake waliporudi kutoka shamba.Wakampeleka hospitali ambako alifanyiwa matibabu na kushonwa bila ganzi.Daktari alikuwa na hakika kuwa Maria angekufa.Alimwomba Maria akienda mbinguni asimsahau.Siku iliyo...
Read more