HABARI ZAIDI

Ushoga siyo haki ni udhalilishaji wa binadamu


Na Pascal Mwanache, Dar es salaam
Katika kuadhimisha miaka 70 ya azimio la ulimwengu la haki za binadamu viongozi wa dini kutoka Baraza la Maaskofu Katoliki Tanzania (TEC), Baraza Kuu la Waislamu Tanzania (BAKWATA) na Jumuiya ya Kikristo Tanzania (CCT) wamekutana na kuweka wazi kuwa wanalo jukumu la kusimamia haki huku wakibainisha kuwa vitendo vya ushoga vinadhalilisha utu wa mwanadamu.
Akitoa mada katika kongamano hilo Katibu Mkuu wa TEC Padri Dkt. Charles Kitima amesema kuwa katika jamii zote, haki za binadamu zipo hasa katika mila na desturi na kwamba haki za msingi ni stahili za kila binadamu kwa sababu ya utu wake.
“Maandiko Matakatifu yanatambua haki za binadamu kwa mfano haki ya kuwa na familia, kuoa na kuolewa. Ndiyo maana ushoga unapigwa vita. Ndoa iwe na fursa ya kuendeleza ubinadamu. Utaletaje ndoa ambayo haina ya kuzaa” amehoji Padri Kitima.
Aidha amesema kuwa viongozi wa dini hawana budi kupigania na kusimamia haki za wanyonge kama ambavyo wanaendelea kufanya bila woga. Ameongeza kuwa Kanisa Katoliki linahuisha mchango wa kimaadili kwa jamii, na hivyo kuhimiza umuhimu wa kulinda haki za binadamu.
“Tangu mwaka 1997 viongozi wa dini wamepambana na haki katika migodi na kuisaidia serikali. Miaka 20 mmepiga vita na kusimamia haki ya mnyonge mpaka haki ifanyike. Hivyo viongozi wa dini tuna kazi pia ya kulinda haki za umiliki wa ardhi kwa manufaa ya wananchi wote” amesema.
Kwa upande wake Mjumbe wa Baraza la Ulamaa BAKWATA Sheikh Issa Athuman Issa amesema kuwa mwili wa binadamu ni dhamana kutoka Mungu na hivyo haki za binadamu hazina budi ziangaliwe kwenye jicho la kiimani.
“Wengine wanazungumzia kuwa mwili wake ni milki yake na anaweza kuutumia kadiri anayotaka. Vifungu 2 na 3 vinaungana na dharura tano kadiri ya Uislamu: Moja, kuhifadhi dini: kuheshimu yanayorudiwa; Mbili, kuhifadhi nafsi yake na ya wengine “Wewe, usidhuru, na usiwe na sababu ya mwingine kudhurika. Tatu, Kuhifadhi akili: dhidi ya ulevi, madawa ya kulevya. Nne, kuhifadhi nasaba au koo, kwa utaratibu wa kuoana. Kama ushoga hauhifadhi ukoo. Tuliogope na tulilinde sana swala la koo na nasaba. Na tano ni kuhifadhi hadhi ya mtu, nafsi yake” amesema .
Pia aeongeza kuwa msingi wa kwanza ni kumfanya mtu ajitambue thamani yake na hivyo viongozi wa dini wanapaswa wahakikishe kuwa binadamu anatambua thamani yake. “Tuambukize kwa watoto wetu kujitambua kuwa wana thamani kama binadamu” ameeleza.
Akielezea juu ya maadhimisho hayo Askofu wa Jimbo Katoliki Mbinga Mhashamu John Ndimbo amesema kuwa azimio hilo ni chimbuko la viongozi wa dini mbalimbali kukaa pamoja na kutathmini mikakati itakayowawezesha katika kulinda na kutetea haki za binadamu.
“Azimio hili ndani ya miaka 70 limetufanya sisi wa dini mbalimbali tuje pamoja tuzungumze pamoja, tukae pamoja tuangalie watu wetu wanaishi namna gani na wanapata haki zao” amesema.
Naye Sheikh wa Mkoa wa Pwani Sheikh Hamis Mtupa amebainisha kuwa vitendo vya ushoga havipaswi kukingiwa kifua mbele kwa kuwa havikubaliki kwa Mungu na hata kwa jamii.
“Kuna haki nyingine ambazo huwa zinasemwa kuwa ni haki za kibinadamu lakini siyo haki za kibinadamu bali ni haki za kudhalilisha utu wa mwanadamu. Ni kama vile mahusiano ya jinsi moja, wanawake kwa wanawake au wanaume kwa wanaume. Ni jambo ambalo halifai. Ni jambo ambalo tunapaswa kuliondoa kwani linamuudhi Mungu” ameweka wazi.
Kwa upande wake Askofu wa AIC Pwani Askofu  Charles Salala amesema kuwa kitu muhimu ni jinsi ambavyo jamii ya sasa inavyorithisha maadili kwa kizazi kinachofuata.
“Jinsi tunavyoishi sasa ndiyo huamua jinsi kizazi kitakachofuata kitakavyokuwa. Tunahitaji kuwekeza kwa watoto na vijana wetu” amesema.
Maadhimisho hayo yamefanyika Desemba 10 katika ukumbi wa mikutano Golden Tulip jijini Dar es salaam na kuhudhuriwa pia na wadau wa masuala ya haki za binadmu nchini.


Askofu Lebulu aadhimisha Jubilei ya Dhahabu ya Upadri

 
Na Sarah Pelaji, Same-Kisangara Juu
Askofu Mkuu Mstaafu wa Jimbo Kuu Katoliki Arusha Mhashamu Josaphat Lebulu ameadhimisha Jubilei ya dhahabu ya  Upadri  yaani miaka 50 tangu alipopata Daraja Takatifu la Upadri.
Jubilei hiyo imeadhimishwa Desemba 11 mwaka huu katika Parokia ya Kisangara Juu Jimbo Katoliki Same ambapo parokia hiyo pia imeadhimisha miaka 50 tangu ilipoanzishwa na katika parokia hiyo ndipo Askofu Mkuu Mstaafu Lebulu alipewa Daraja Takatifu la Upadri na  Askofu Joseph Kilasara Desemba 11 mwaka 1968.
Katika maadhimisho hayo, Rais wa Baraza la Maaskofu Katoliki Tanzania Mhashamu Gervas Nyaisonga amesema kuwa, kwa niaba ya Maaskofu wakatoliki Tanzania, anampongeza Askofu Lebulu kwa kufanya kazi ya utume uliotukuka huku akimsihi aendelee kulisaidia Kanisa akitumia hekima na vipawa alivyojaliwa.
“Ni wazi Askofu Lebulu amestaafu na anaadhimisha jubilei hii ya dhahabu lakini bado ana nguvu na anahitajika katika Kanisa. Sisi tunamuombea Mungu azidi kumpa nguvu ili tuendelee kufanya kazi pamoja huku tukiiga mfano wake ambao ni kielelezo kwetu sisi watoto wake na wengine wana urika wenzake.
Ana karama mbalimbali ambazo zimeshuhudiwa na wengi na sisi maaskofu tunamfahamu na kutambua vipawa vyake hivyo tunamuomba aendelee kulisaidia Kanisa kwa mashauri yake na hata pale tutakapomuhitaji katika masuala mbalimbali ya kulijenga Kanisa,” amesema Askofu Nyaisonga ambaye pia ni Askofu wa Jimbo Katoliki Mpanda.
Akihubiri katika Misa hiyo Takatifu, Askofu wa Jimbo Katoliki Same Mhashamu Rogathy Kimaryo amesema kuwa, anampongeza Askofu Lebulu kwa utume wake tangu alipopewa Daraja Takatifu la Upadri miaka 50 iliyopita.
Pia anampongeza kwa kuliongoza Jimbo la Same kama Askofu takribani kwa miaka 20.
“Mimi ninayefanya kazi katika jimbo hili ninatoa ushuhuda kuwa Askofu Lebulu anazo karama mbalimbali zinazoonekana wazi.
Kwanza kuliongoza jimbo la Same kwa miaka mingi ni dhahiri kwamba alitumia vipawa vyake maana kupewa kuongoza Jimbo la Same kunahitaji kujikubali na kulikubali kwanza jimbo hili. Lina umasikini  wa miundo kwa mazingira yake ya milima iliyopo.
Siyo kazi rahisi kufanya uchungaji hapa. Pili Askofu Lebulu ana karama za kuombea na kubariki watu, kuhubiri, sala, kazi na mwalimu mzuri.
Kumbe anapoadhimisha Jubilei ya miaka 50 ya upadri wake tunamshangilia na kumpongeza kwa kazi iliyotukuka ambayo imeacha alama wazi katika Kanisa,” amesema Askofu Kimaryo.
Pia amempongeza licha tu ya kufanya utume katika jimbo la Same, amefanya pia utume katika Jimbo Kuu Katoliki Arusha ambalo lina maeneo mbalimbali yenye changamoto za miundombinu na ni jimbo kubwa lenye watu wa tamaduni mbalimbali.
Amewaasa waamini wa Jimbo Katoliki Same kuendelea kumuombea Askofu Mkuu Mstaafu Josaphat Lebulu kwani ni Askofu ambaye alitoa Jimbo Katoliki Same mbali na kulifikisha mbali.
“Alianzisha Chanjale seminary na wengi wenu mlisomea hahapo. Isingekuwa Chanjale Seminary wengi wenu msingekuwa jinsi mlivyo na msingekuwa na maisha mliyo nayo sasa. Kwanza Chanjale Seminary ni seminary maalumu kwani inasomesha hadi wasichana. Ameleta maendeleo mbalimbali ya kiroho na kimwili. Hongera sana,” amesema Askofu Kimaryo.
Aidha amewapongeza waamini wa Kisangara Juu kwa kujitoa kujenga Kanisa kubwa la kisasa kwa kutumia nguvu zao wakati huu wanaposherehekea Jubilei ya miaka 50 ya parokia hiyo.
Amewataka wasomi walioko mjini wa parokia hiyo kuendelea kusaidia nyumbani kwao ili Kanisa la Mungu limalizike na kuwa maridadi kwa ajili ya kutolea sadaka Takatifu.
Kwa upande wake Askofu Mkuu Mstaafu Lebulu amesema kuwa, anapenda kuwashukuru wazazi wake waliomlea katika misingi ya imani ya Kanisa Katoliki, kumsomesha hadi kufikia Daraja Takatifu la Upadri. Pia anawashukuru Maaskofu kwa ushirikiano wao kwake, mapadri, watawa na waamini walei walioweza kumvumilia katika mapungufu yake.
Amemshukuru Mungu kwani yeye ni mkosefu aliyesamehewa na akastahilishwa kuwa Padri na Askofu hadi alipostaafu salama.
Amewaasa maaskofu, mapadri na waamini kuwa wamoja katika utume wa kuliongoza Kanisa.       
Askofu Mkuu Mstaafu Josaphat Louis Lebulu amezaliwa 13 Juni 1942. Alipewa Daraja Takatifu la Upadri na Askofu Joseph Kilasara Desemba 11 mwaka 1968 katika Parokia ya Kisangara Juu. Aliwekwa wakfu na Kardinali Laurean Rugambwa mwaka 1979 na kusimikwa kuwa Askofu wa Jimbo Katoliki Same mwaka 1979 mpaka 1998. Mwaka 1999 alisimikwa kuwa Askofu Mkuu wa Jimbo Kuu Katoliki Arusha  hadi 27 Desemba 2017 ambapo alistaafu.