Muigizaji maarufu mateso ya Yesu Kristo asaka mrithi wake

- July 14, 2017

MUIGIZAJI maarufu wa mateso ya Yesu Kristo katika msalaba hasa katika kipindi cha Kwaresima ameelezea Hija ya wana utume wa Fatima ya jimboni Mbeya iliyofanyika kijimbo katika Parokia ya Izuo umbali ya kilomita 24 kutoka katika Kigango cha Izuo hadi parokiani hatoweza kuisahau kutokana na kipigo cha ukweli alichopata kutoka kwa askari wa kiyahudi sanjari na kupoteza fahamu.

George Patson Mtambo amesema tangu ameanza kuigiza kama Yesu Kristo kwa zaidi ya miaka 10 iliyopita baada ya kurithishwa na marehemu padri Mpepo katika Parokia ya Mwambani na kuendelea, amesema kupitia njia yake ya msalaba aliyoifanya Izuo hawezi kufananisha aliyowahi kufanya Ileje katika Parokia ya Itumba, Mwambani na katika Mlima Loleza hajawahi kukumbwa na hali kama iliyomtokea katika Hija hiyo.

Akizungumza na KIONGOZI mara baada ya ibada ya misa takatifu ya Jumapili ya hitimisho la Hija hiyo, Mtambo amemuomba Mwenyezi Mungu kupitia Hija hiyo aweze kumsamehe madhambi yote aliyowahi kuyatenda na kwamba iwe kama sehemu ya malipizi yake ili aje kuonja ufalme wa mbinguni.

“Kwa haki sintoweza kuisahau njia ya msalaba katika Hija hii…kwani nilipigwa kibao cha ukweli na kuna kipindi nilianguka siyo kwa kuigiza lakini ni kweli nilielemewa na kuishiwa nguvu na kadiri nilivyozidi kuelekea kituo kimoja kwenda kingine nilizidi kuelemewa na msalaba ambao ulikuwa ni mzito sana na safari ya milima na mabonde ilikuwa ndefu sana,’anasimulia

Ameendelea kusimulia siri nzito ya yaliyomkuta kuwa,” ninakumbuka ghafla nilipigwa na usingizi mzito ulipowadia muda wa kuigiza sasa ninakata roho pale nilipotamka,”Baba wasamehe kwani hawajui watendalo……Mungu wangu!!Mungu wangu mbona umeniacha,”na nilipotamka kuwa,” imekwisha roho yangu naiweka mikononi mwako,” sikuweza kumalizia na ndipo nilipoteza fahamu.

Ameelezea igizo lake la Hija iliyofanyika katika parokia ya Izuo kwamba kwa kipindi chote alichowahi kuigiza hakuwahi kupoteza fahamu lakini pia kipigo alichokipata ikiwemo na msalaba mzito uliomuelemea na safari ndefu ya umbali wa zaidi ya kilomita 24 kutoka kigango cha Isuto hadi parokiani Izuo.

Amezungumzia alivyotandikwa kibao katika kituo cha tatu na kuchapwa na mijeredi hadi akaanguka kwa ukweli huku akielezea alivyoshikwa na butwaa kuwa watu ambao ni wazee na heshima zao na wananchi wengine wa dini nyingine wakiwa wamesimama, wakivua kofia kwa heshima, wakiinama kwa ishara ya kuheshimu huku magari na pikipiki zikiegeshwa pembeni kuipisha safari hiyo.

Ameelezea tukio jingine la ajabu ambalo hakuwahi kuliona tangu ameanza kuigiza ni baadhi ya wananchi kuzoa mchanga katika ile alama ya mfano wa damu zilipokuwa zikimwagika na alipoanguka na kufunga katika nguo zao.

Hata hivyo ameelezea kile kitendo cha kuvuliwa nguo na hakika alikumbwa na hisia kali na alishindwa kujizuia na alianza kulia na baadaye anakumbuka hadi kule makaburini alipobebwa na jeneza halisi linalotumika kubebea miili ya marehemu kwenda kuwazika.

George amesema kuwa ameweka mikakati kuhusu njia ya msalaba kuwa atarithisha mapema ambapo katika Hija ya kitaifa ya mwezi Oktoba,2017 itakayofanyika kupandisha Mlima Loleza atakuwa naye jirani na kwamba hana mpango wa kustaafu kwa sababu kwake anaona ni kama wito lakini ni vyema ukafikia muda Mungu akimjalia kufikia umri wa uzee na nguvu zitakapopunguwa za kuigiza awe tayari ameshamwachia mrithi wake kwa sababu katika mateso ya Yesu hakuonekana hadi uzee wake.

“Vijana wakubali kupokea maisha ya kiroho, hakuna kilicho kigumu mbele ya Mwenyezi Mungu na Mungu atatenda maajabu yake,” na ameelezea kuwa ameanza kuigiza tangu akiwa bado mtoto mdogo mwaka 1972 katika Parokia ya Mtakatifu Maurus Kurasini alikuwa akiigiza siku za sikukuu ya Pasaka na Noeli.

Na anakumbuka walipoandaa onesho la njia ya msalaba mateso ya Yesu Kristo wakiwa na mzungu mmoja aliyemtaja kwa jina la Jemong, wakishiriki maigizo na Mkuu wa Mkoa wa sasa wa Dodoma Jordan Rugimbana kwa ushirikiano na Askofu wa KKKT, Alex Malasusa kwani walikuwa wakishirikiana kuandaa na kufanya maigizo kwa pamoja wakati huo.