VIWAWA SUMBAWANGA WAMWOMBEA KARDINALI PENGO

-


Vijana wa Kanisa Katoliki  Jimbo Katoliki Sumbawanga wamefanya maadhimisho ya misa ya  kumuombea kwa Mwenyezi Mungu Askofu Mkuu wa Jimbo Kuu Dar es Salaam Mwadhama Polycarp Kardinali Pengo azidi kuimarika katika afya yake ili aweze kuendelea na wajibu wake wa utume.

Maombi hayo yamefanyika wakati wa Kongamano la vijana Jimbo Katoliki Sumbawanga lililojumuisha jumla ya vijana 408 kutoka parokia 21 za Jimbo Katoliki Sumbawanga lililofanyika kwa siku 5 na kuhitimishwa dominika ya moyo mtakatifu wa Yesu parokiani Mwazye sehemu ambapo alizaliwa Kadinali Pengo.

Akiongoza mamia ya vijana katika Kongamano hilo, Mkurugenzi Idara ya vijana Jimbo Katoliki Sumbawanga padri Christopher Mayemba amewapongeza vijana kwa uamuzi wao huo wa kujali na kuthamini wazee na hasa viongozi wa Kanisa katika mwaka huu wa Jubilei ya miaka 100 ya upadri kwani kunaonesha kujali na kuthamini shughuli za kichungaji zinazofanywa na Askofu Mkuu huyo.

“Ninawapongeza sana wapendwa vijana katika misa hii kwa kumuombea kwa Mwenyezi Mungu Kardinali Pengo ambaye hivi karibuni amerejea nchini kutokea kwenye matibabu, hivyo Mwenyezi Mungu amjalie nguvu na afya njema ya mwili na roho aweze kuimarika na kuendeleza utume. Mmefanya kitu chema na hasa kwa mwaka huu ambapo Kanisa la Tanzania linafanya Jubilei ya miaka 100 ya upadri, basi mzidi kuwaombea mapadri na kuwasaidia waweze kufanya utume wao wa kuliongoza Kanisa kwa sifa na utukufu wa Mungu,” amesema padri Mayemba.

Akieleza malengo ya Kongamano hilo kwa vijana kwa mwaka huu wa Jubilei ya miaka 150 ya Ukristo na miaka 100 ya upadri kufanyika katika parokia ya Mwazye, Katibu Mtendaji Idara ya Vijana Jimbo Bw. Emanuel Mathias amesema kuwa parokia ya Mwazye ina historia ya pekee katika Kanisa na hasa Jimbo Sumbawanga  kwa kuzaa miito mitakatifu ya utawa na upadri na zaidi kutoa maaskofu wawili ambao wanaendelea kulitumikia Kanisa  akiwepo Askofu wa  Jimbo Katoliki Shinyanga Mhashamu Liberatus Sangu na Mwadhama Polycarp Kardinali Pengo, Askofu Mkuu wa Jimbo Kuu Dar es Salaam ambao wamezaliwa katika parokia hiyo.

“Mbali ya zawadi hii ya miito mitakatifu jimboni Sumbawanga na Taifa kwa ujumla ni jukumu letu pia kuwaombea viongozi wetu wazawa wa parokia hii  na hasa Kadinali ambaye amerejea kutoka kwenye matibabu hivi karibuni, wito wetu pia ni kwa viwawa wenzetu Tanzania kuungana nasi katika kumuombea ili Mwenyezi Mungu aweze kumjalia afya njema azidi kuchunga kondoo wake na hasa vijana ambao ndilo Kanisa la kesho.”

Kongamano hilo la vijana hufanyika kila mwaka jimboni Sumbawanga ambapo huhusisha parokia 21 zinazounda Kanda 4 ambazo ni Kanda ya Kati inayoundwa na parokia za Kanisa Kuu, Kristo Mfalme, Roho Mtakatifu, Mt. Fransisko wa Asizi, Ipito, Izimba na parokia ya Familia Takatifu. Kanda ya Kusini inayoundwa na parokia za Tunduma, Laela, Mpui, Kaengesa na parokia ya Mwazye. Kanda ya Kalambo inayoundwa na parokia za Ulumu, Matai, Sopa na Kasanga pamoja na Kanda ya Nkasi inayoundwa na parokia za  Chala, Namanyere, Kirando na parokia ya Kala.

Comments

Post a Comment

Popular posts from this blog

SALA YA ASUBUHI:SALI HIVI..

-
SALA YA ASUBUHI. Kwajina la Baba na la Mwana na la Roho Mtakatifu. Amina. Ee Baba yetu Mungu mkuu, Umenilinda usiku huu. Nakushukuru kwa moyo, Ee Baba, Mwana na Roho. Nilinde tena siku hii, Niache dhambi, nikutii. Naomba sana Baba wee, Baraka zako nipokee. Bikira safi, Ee Maria Nisipotee nisimamie. Mlinzi mkuu malaika wee, Kwa Mungu wetu niombee Nitake nitende mema tu, Na mwisho nije kwako juu. Amina. NIA NJEMA. Kumheshimu Mungu wangu Namtolea roho yangu, Nifanye kazi nipumzike Amri zake tu nishike Wazo, neno, tendo lote Namtolea Mungu pote Roho, mwili chote changu, Pendo na uzima wangu Mungu wangu nitampenda, Wala dhambi sitatenda. Jina lako nasifia, Utakalo hutimia. Kwa utii navumilia Teso na matata pia. Nipe, Bwana, neema zako Niongeze sifa yako. Amina. SALA YA MATOLEO. Ee Yesu, kwa mikono ya Bikira Maria, na kwa maungano na sadaka yako kuu, ninakutolea sala, matendo, masumbuko na furaha zangu zote za leo. Ee Yesu, ufalme wako utufikie. BABA YETU. Baba yetu uliye mbinguni, jina
Read more

Ujio wa Wamisionari wa Kwanza Tanzania Bara (2)

-
Image
Na Charles Rwehumbiza UINJILISHAJI BAGAMOYO NA TANZANIA KWA UJUMLA Kutokea Bagamoyo, wamisionari wa Shirika la Roho Mtakatifu waliweza kuendelea kuinjilisha sehemu mbalimbali za Tanzania kama vile Mhonda (Morogoro), Mandera (Morogoro), Kilema Kibosho (Moshi) na Kondoa, n.k. Kutokana na ugumu wa watu wa Bagamoyo kukubali Injili na uamuzi wa wamisionari wenye asili ya Uholanzi kuhamia Morogoro mjini.  Bagamoyo iliachwa kwa kipindi kirefu bila huduma za mapadri au wakiwa wanapata  huduma ya Misa Takatifu  mara moja kwa mwezi. Jambo hili lilisababisha ukuaji wa Kanisa la Bagamoyo kuwa duni sana hadi mwaka 1992 padri mwafrika wa kwanza alipoingia na kuweka makazi ya kudumu Bagamoyo.  Padri huyu wa kwanza mwafrika kuinjilisha Bagamoyo sio mwingine ila Padrei Valentine Bayo wa Shirika la Roho Mtakatifu. Tangu aingie Bagamoyo, Padri Bayo chini ya usimamizi wa shirika lake, ameweza kuipa Bagamoyo hadhi iliyo nayo leo hii. Hakika haitakuwa vibaya kumwita Padri Bayo “ Baba wa Uinjilish
Read more

HISTORIA YA SHEREHE YA MOYO MTAKATIFU WA YESU

-
Image
  Na Philip Komba Utangulizi:   Ibada ya Moyo Mtakatifu wa Yesu ni moja ya ibada zinazojulikana sana katika Kanisa Katoliki. Ibada hii inauona Moyo wa Kibinadamu wa Yesu kama mwakilishi wa Mapendo yake ya Kimungu kwa wanadamu , na Kanisa nayo inaiona kama Mapendo na Huruma ya Yesu kwa wanadamu wote. Ibada ya Moyo Mtakatifu wa Yesu imefikia hatua hii tunayoishuhudia leo kutokana na maelekezo ya Mtakatifu Margareta Maria Alakok aliyejifunza uendelezaji wake wakati alipokuwa anatokewa na Yesu kwa mfululizo kati ya mwaka 1673 na mwaka 1675. Mtawa mwingine tena, Mwenyeheri Maria wa Moyo Mtakatifu (1863-1899), kutoka Chama cha Kitawa cha Mchungaji Mwema huko Ujerumani, aliisisimkia sana ibada hii baada ya kuwa na mazungumzo ya ana kwa ana na Yesu na akawahi hata kumwomba Papa Leo XIII, autolee ulimwengu wote kwa Moyo Mtakatifu wa Yesu kama alivyotumwa na Yesu. Wakati wa kipindi cha enzi ya kati, watangulizi wa ibada hii mpya, walijitokeza kutoka sehem
Read more