ZIGO LAKO USIMTWISHE MTU, PAMBANA NALO MWENYEWE

-


Binadamu tuna hulka ya kuwatwisha watu zigo la lawama pindi tunapoonekana tumeshindwa kutimiza malengo au wajibu wetu iwe nyumbani ama katika jamii zinazotuzunguka.
Mifano ipo mingi. Baba katika familia ameshindwa kutimiza majukumu yake kama baba kwa mama; kumtunza, kumjali, kumheshimu, kumvumilia, kutosaliti ndoa na zaidi kumpenda kwa dhati. Matokeo yake mama kaona hayo hayapati kaanza naye kupoteza sifa za “umama” ndani ya nyumba. Mzee kaanza mara ooh dada zake wanamrubuni, ooh mashoga zake wanamhadaa, ooh wazazi wake ndio chanzo, ooh kapata mtu mwingine nje ya ndoa n.k.
Kijana hasomi, hajibidiishi, hana machungu na ada na gharama wazazi au walezi wake wanazotoa ili afaulu vizuri masomo yake. Kutwa yupo mitandaoni akichati hili na lile, anajiingiza katika mahusiano akiwa mdogo, anajihusisha na matumizi ya dawa za kulevya, unywaji viroba, mwisho wa siku anapofeli utasikia aah dingi mnoko, maza anabana, ticha ananifuatilia sana.
Kabla hajapata ajira na baada ya kuteseka sana mtaani akisaka ajira au kupata unafuu wa maisha, kijana anapata ajira. Na ikumbukwe kabla hajaipata hiyo ajira aliapa kuwa akiipata kazi ataifanya kwa jitihada zote ili atimize malengo. Kinyume na hayo, yeye kawa mtu wa kushinda mitandaoni, kupiga majungu, kuchochea wenzake wagome, uzembe, kutotimiza wajibu, umbea n.k. matokeo yake kitumbua kinaingia mchanga na hapo utasikia mara nimerogwa, fulani kanichoma kwa bosi, aagh bosi mnoko na sababu kedekede.
Haya, wengi wetu hatupendi kujishughulisha kutokana na hali tulizonazo. Wasomi wengi vijana wanataka tu wanapohitimu basi wapate kazi katika ofisi mbalimbali, wapate mishahara mikubwa, waendeshe magari, wajenge nyumba, waishi raha mustarehe, si vibaya..lakini je, wanapokosa hizo kazi wanafanya nini? Hawana njia mbadala. Vijana wengi wapo mitaani hawana ajira rasmi, kutwa kushinda vijiweni na kujihusisha na tabia mbaya zikiwemo ukabaji, ujambazi, ulevi, matumizi ya dawa za kulevya n.k, lakini waulize tatizo nini? Wote hawa watakwambia tatizo Serikali. Ukimwuliza Serikali imefanya nini, utasikia mara ooh haitupi mitaji, haitupi fursa n.k..kwani serikali ni nani?itawapa vijana wangapi hiyo mitaji nchi nzima? Mmejiunga katika makundi ikawanyima?
Kama nilivyosema mifano ni mingi. Nionavyo mimi ni kuwa kumbe kabla hujapata muda wa kumnyooshea mtu kidole kuwa yeye ndio chanzo cha wewe kutofanikiwa katika jambo fulani, jitathimini kwanza wewe, je upo sahihi?
Mara unapoona mambo hayaendi vizuri shuleni, nyumbani, kazini, katika jamii na sehemu zingine ambazo wewe unahusika nazo kila siku, usimtafute mchawi kwanza. Chukua muda wa kutosha, kaa peke yako katika eneo tulivu kabisa bila kumshirikisha mtu yeyote yule. Tafakari kwa kina (meditation). Ongea na hisia zako tu huku ukimshirikisha Mungu tu. Jiulize mara nyingi kuwa hao watu unaowatwisha zigo la lawama ghafla wakitoweka katika maisha yako utafanikiwa zaidi au ndio mwisho wako utakuwa umefika?
Nionavyo mimi mchawi wa mtu ni yeye mwenyewe. Hivyo, jenga utaratibu wa kukaa na kufanya meditation na kujiuliza nakosea wapi? Fukuza kabisa hisia za kumtaja mtu katika sababu za wewe kutofanikiwa.
Na ndio maana wataalamu wa afya mara nyingi wanashauri kuwa unapopata tatizo katika maisha, tulia kwanza. Chukua muda wa kutosha kulitafakari kwa kina. Kwa namna hiyo tena katika hali ya utulivu mkubwa utafahamu chanzo (kama ni wewe) na utatabasamu sababu njia ya kulimaliza tatizo hilo yawezekana ni rahisi mno.
Kwa kufanya hivi hakika utaishi kwa furaha huku kila kitu unachopanga ukiona kinafanikiwa. Na utaondoa uwezekano wa kupata magonjwa mbalimbali hasa shinikizo la damu.

Na; Bernard James

Comments

Post a Comment

Popular posts from this blog

SALA YA ASUBUHI:SALI HIVI..

-
SALA YA ASUBUHI. Kwajina la Baba na la Mwana na la Roho Mtakatifu. Amina. Ee Baba yetu Mungu mkuu, Umenilinda usiku huu. Nakushukuru kwa moyo, Ee Baba, Mwana na Roho. Nilinde tena siku hii, Niache dhambi, nikutii. Naomba sana Baba wee, Baraka zako nipokee. Bikira safi, Ee Maria Nisipotee nisimamie. Mlinzi mkuu malaika wee, Kwa Mungu wetu niombee Nitake nitende mema tu, Na mwisho nije kwako juu. Amina. NIA NJEMA. Kumheshimu Mungu wangu Namtolea roho yangu, Nifanye kazi nipumzike Amri zake tu nishike Wazo, neno, tendo lote Namtolea Mungu pote Roho, mwili chote changu, Pendo na uzima wangu Mungu wangu nitampenda, Wala dhambi sitatenda. Jina lako nasifia, Utakalo hutimia. Kwa utii navumilia Teso na matata pia. Nipe, Bwana, neema zako Niongeze sifa yako. Amina. SALA YA MATOLEO. Ee Yesu, kwa mikono ya Bikira Maria, na kwa maungano na sadaka yako kuu, ninakutolea sala, matendo, masumbuko na furaha zangu zote za leo. Ee Yesu, ufalme wako utufikie. BABA YETU. Baba yetu uliye mbinguni, jina
Read more

Ujio wa Wamisionari wa Kwanza Tanzania Bara (2)

-
Image
Na Charles Rwehumbiza UINJILISHAJI BAGAMOYO NA TANZANIA KWA UJUMLA Kutokea Bagamoyo, wamisionari wa Shirika la Roho Mtakatifu waliweza kuendelea kuinjilisha sehemu mbalimbali za Tanzania kama vile Mhonda (Morogoro), Mandera (Morogoro), Kilema Kibosho (Moshi) na Kondoa, n.k. Kutokana na ugumu wa watu wa Bagamoyo kukubali Injili na uamuzi wa wamisionari wenye asili ya Uholanzi kuhamia Morogoro mjini.  Bagamoyo iliachwa kwa kipindi kirefu bila huduma za mapadri au wakiwa wanapata  huduma ya Misa Takatifu  mara moja kwa mwezi. Jambo hili lilisababisha ukuaji wa Kanisa la Bagamoyo kuwa duni sana hadi mwaka 1992 padri mwafrika wa kwanza alipoingia na kuweka makazi ya kudumu Bagamoyo.  Padri huyu wa kwanza mwafrika kuinjilisha Bagamoyo sio mwingine ila Padrei Valentine Bayo wa Shirika la Roho Mtakatifu. Tangu aingie Bagamoyo, Padri Bayo chini ya usimamizi wa shirika lake, ameweza kuipa Bagamoyo hadhi iliyo nayo leo hii. Hakika haitakuwa vibaya kumwita Padri Bayo “ Baba wa Uinjilish
Read more

HISTORIA YA SHEREHE YA MOYO MTAKATIFU WA YESU

-
Image
  Na Philip Komba Utangulizi:   Ibada ya Moyo Mtakatifu wa Yesu ni moja ya ibada zinazojulikana sana katika Kanisa Katoliki. Ibada hii inauona Moyo wa Kibinadamu wa Yesu kama mwakilishi wa Mapendo yake ya Kimungu kwa wanadamu , na Kanisa nayo inaiona kama Mapendo na Huruma ya Yesu kwa wanadamu wote. Ibada ya Moyo Mtakatifu wa Yesu imefikia hatua hii tunayoishuhudia leo kutokana na maelekezo ya Mtakatifu Margareta Maria Alakok aliyejifunza uendelezaji wake wakati alipokuwa anatokewa na Yesu kwa mfululizo kati ya mwaka 1673 na mwaka 1675. Mtawa mwingine tena, Mwenyeheri Maria wa Moyo Mtakatifu (1863-1899), kutoka Chama cha Kitawa cha Mchungaji Mwema huko Ujerumani, aliisisimkia sana ibada hii baada ya kuwa na mazungumzo ya ana kwa ana na Yesu na akawahi hata kumwomba Papa Leo XIII, autolee ulimwengu wote kwa Moyo Mtakatifu wa Yesu kama alivyotumwa na Yesu. Wakati wa kipindi cha enzi ya kati, watangulizi wa ibada hii mpya, walijitokeza kutoka sehem
Read more