Geita waandaa Hija ya Miaka 100 ya Upadri

-
Jimbo Katoliki Geita linatarajia kuhitimisha Jubilei ya miaka 100 ya Upadri Kijimbo kwa Hija ya aina yake itakayoambatana na Misa Takatifu itakayoongozwa na Askofu wa Jimbo hilo Mhashamu Flavian Kassala katika Parokia ya Nyantakubwa kwenye eneo lenye masalia ya Mmisionari wa kwanza.

Akitangaza tukio hilo hivi karibuni, Mwenyekiti wa Kamati ya Hija, Padri George Nkombolwa amesema pamoja na kwamba maadhimisho ya kuenzi miaka 100 ya upadri Tanzania Bara kijimbo yamepewa uzito mkubwa kwa sababu mmoja wa mapadri wanne wa kwanza wazalendo, (Pd. Angelo Mwilabure) alitokea Jimboni Geita katika Parokia ya Kome-Nyakasasa, Jimbo pia lina Misioni Kongwe iliyoanzishwa miaka ya 1880 na mapadri wa Shirika la White Fathers, ambapo mmoja wao, Padri Mfaransa "Combarieu"alizikwa na masalia yake yanasadikika kuwepo maeneo hayo.

Padri Nkombolwa ambaye pia ni Paroko wa Parokia ya Nyantakubwa amesema uwepo wa Misioni Kongwe kupita zote kwa upande wa Kusini mwa ziwa Victoria, iliyojulikana kama "Misioni ya Mranda" eneo liitwalo Nyamatongo (kwa sasa) karibu na kivuko cha Kamanga, ni uthibitisho tosha kuwa Jimbo Katoliki Geita ni miongoni mwa maeneo yaliyowahi kupata huduma ya mapadri.

"Ni fahari kuwa tunao mlango wa imani ndani ya Jimbo Katoliki Geita katika Parokia iitwayo Nyantakubwa ambapo Wamisionari wa Afrika walifika kwa mara ya kwanza miaka ya 1887 na kuanzisha Parokia ya kwanza kabisa eneo la Mranda (Nyamatongo Ziwani), na baada ya kutoelewana na Mtemi Rwoma wa Karumo waliondoka na kuacha wamesimika Msalaba Mkubwa uliopafanya mahali hapo kwa miaka mingi kujulikana kama "Nyamatongo Msalabani", amesema Padri George.

Amesema Parokia zote za Jimbo hilo wameamua kufanya Hija hapo Msalabani (Misioni iliyopotea ya Mranda) kama sehemu ya kuienzi Jubilei ya Miaka 100 ya kupata mapadri wazalendo, sababu eneo hilo lilionja huduma ya mapadri kwa mara ya kwanza kabisa katika ukanda wa Kusini mwa Ziwa Victoria, na kuacha hapo msalaba na mawe na hivyo imependeza kuwa eneo la Hija.

Kanisa Katoliki Tanzania mwaka huu 2017 linatimiza miaka 100 tangu kuwapata mapadri wa kwanza waafrika waliosoma huko seminarini Rubya na Kajunguti na kuhitimu mafunzo ya Upadri mwaka 1917 huko Jimboni Bukoba, ambao ni mapadri Wilibard Mupapi na Oscar Kyakaraba wa Bukoba, Celestine Kipanda wa Ukerewe na Angelo Mwilabure wa Geita.

Awali akitangaza rasmi kuzinduliwa kwa maadhimisho ya miaka 100 ya Upadri siku ya Misa ya Kubariki Mafuta, Katibu wa Kamati ya Hija, Padri Gelard Singu amesema waamini wa Geita waliwatolea mapadri na Baba Askofu fedha zaidi ya Tsh milioni 20 kama ishara ya kuenzi huduma ya upadri.

Padri Singu amesema kuwa hitimisho la hija kijimbo litaambatana na Matembezi ya Msalaba hadi parokiani Nyantakubwa, semina mbalimbali za uinjilishaji, Ibada ya kitubio, nyimbo za sifa, maigizo ya kuja kwa wamisionari na kesho yake Misa Takatifu eneo la Nyamatongo Msalabani, alipozikwa padri Comparieu.


Maadhimisho kitaifa ya uzinduzi wa Jubilei hii yalifanyika huko Seminarini Rubya kwa Misa Takatifu iliyoongozwa na Askofu Mkuu wa Jimbo Kuu Mwanza Mhashamu Yuda Tadei Ruwa'ichi, na kuhudhuriwa na maelfu ya waamini kutoka majimbo mbalimbali, mapadri na watawa huku kilele kikiwa ni tarehe 15/08/2017 Jimbo Kuu Dodoma.


Comments

Post a Comment

Popular posts from this blog

SALA YA ASUBUHI:SALI HIVI..

-
SALA YA ASUBUHI. Kwajina la Baba na la Mwana na la Roho Mtakatifu. Amina. Ee Baba yetu Mungu mkuu, Umenilinda usiku huu. Nakushukuru kwa moyo, Ee Baba, Mwana na Roho. Nilinde tena siku hii, Niache dhambi, nikutii. Naomba sana Baba wee, Baraka zako nipokee. Bikira safi, Ee Maria Nisipotee nisimamie. Mlinzi mkuu malaika wee, Kwa Mungu wetu niombee Nitake nitende mema tu, Na mwisho nije kwako juu. Amina. NIA NJEMA. Kumheshimu Mungu wangu Namtolea roho yangu, Nifanye kazi nipumzike Amri zake tu nishike Wazo, neno, tendo lote Namtolea Mungu pote Roho, mwili chote changu, Pendo na uzima wangu Mungu wangu nitampenda, Wala dhambi sitatenda. Jina lako nasifia, Utakalo hutimia. Kwa utii navumilia Teso na matata pia. Nipe, Bwana, neema zako Niongeze sifa yako. Amina. SALA YA MATOLEO. Ee Yesu, kwa mikono ya Bikira Maria, na kwa maungano na sadaka yako kuu, ninakutolea sala, matendo, masumbuko na furaha zangu zote za leo. Ee Yesu, ufalme wako utufikie. BABA YETU. Baba yetu uliye mbinguni, jina
Read more

Ujio wa Wamisionari wa Kwanza Tanzania Bara (2)

-
Image
Na Charles Rwehumbiza UINJILISHAJI BAGAMOYO NA TANZANIA KWA UJUMLA Kutokea Bagamoyo, wamisionari wa Shirika la Roho Mtakatifu waliweza kuendelea kuinjilisha sehemu mbalimbali za Tanzania kama vile Mhonda (Morogoro), Mandera (Morogoro), Kilema Kibosho (Moshi) na Kondoa, n.k. Kutokana na ugumu wa watu wa Bagamoyo kukubali Injili na uamuzi wa wamisionari wenye asili ya Uholanzi kuhamia Morogoro mjini.  Bagamoyo iliachwa kwa kipindi kirefu bila huduma za mapadri au wakiwa wanapata  huduma ya Misa Takatifu  mara moja kwa mwezi. Jambo hili lilisababisha ukuaji wa Kanisa la Bagamoyo kuwa duni sana hadi mwaka 1992 padri mwafrika wa kwanza alipoingia na kuweka makazi ya kudumu Bagamoyo.  Padri huyu wa kwanza mwafrika kuinjilisha Bagamoyo sio mwingine ila Padrei Valentine Bayo wa Shirika la Roho Mtakatifu. Tangu aingie Bagamoyo, Padri Bayo chini ya usimamizi wa shirika lake, ameweza kuipa Bagamoyo hadhi iliyo nayo leo hii. Hakika haitakuwa vibaya kumwita Padri Bayo “ Baba wa Uinjilish
Read more

HISTORIA YA SHEREHE YA MOYO MTAKATIFU WA YESU

-
Image
  Na Philip Komba Utangulizi:   Ibada ya Moyo Mtakatifu wa Yesu ni moja ya ibada zinazojulikana sana katika Kanisa Katoliki. Ibada hii inauona Moyo wa Kibinadamu wa Yesu kama mwakilishi wa Mapendo yake ya Kimungu kwa wanadamu , na Kanisa nayo inaiona kama Mapendo na Huruma ya Yesu kwa wanadamu wote. Ibada ya Moyo Mtakatifu wa Yesu imefikia hatua hii tunayoishuhudia leo kutokana na maelekezo ya Mtakatifu Margareta Maria Alakok aliyejifunza uendelezaji wake wakati alipokuwa anatokewa na Yesu kwa mfululizo kati ya mwaka 1673 na mwaka 1675. Mtawa mwingine tena, Mwenyeheri Maria wa Moyo Mtakatifu (1863-1899), kutoka Chama cha Kitawa cha Mchungaji Mwema huko Ujerumani, aliisisimkia sana ibada hii baada ya kuwa na mazungumzo ya ana kwa ana na Yesu na akawahi hata kumwomba Papa Leo XIII, autolee ulimwengu wote kwa Moyo Mtakatifu wa Yesu kama alivyotumwa na Yesu. Wakati wa kipindi cha enzi ya kati, watangulizi wa ibada hii mpya, walijitokeza kutoka sehem
Read more