Naibu Waziri Kwandikwa atoa msaada katika shule ya Jimbo la kahama

Na Patrick Mabula, Kahama.

NAIBU waziri wa Ujenzi na Mawasiliano, Elias Kwandikwa na Mbunge wa Jimbo la Ushetu , Wilaya Kahama amelishukuru  Kanisa Katoliki  kwa mchango wake katika kutoa huduma za jamii ikiwemo afya na elimu.

Amesema hayo alipotembelea shule hiyo hivi karibuni katika ziara yake mjini Kahama ili kutekeleza ahadi yake aliyoitoa kwa shule hiyo  alipokuwa mgeni rasmi katika mahafali ya kwanza ya wahitumu wa darasa la saba mwaka 2016.

Hivyo ameambatanisha shukrani hizo kwa kutoa msaada wa komputa mbili zenye thamani ya shilingi 2,000,000 katika shule ya msingi ya Mtakatifu Athony wa Padua ya jimbo Katoliki Kahama.

“Serikali  inatambua mchango wa Kanisa katika huduma  za jamii. Nami ninawashukuru sana kwa kazi hiyo ya kuunga mkono jitihada  za serikali.

Nami ninaunga mkono jitihada zenu kwa kidogo nilichotoa ili kwa pamoja tulijenge taifa letu,” amesema.

Kwa upande wao watoto wanaosoma shule ya hiyo ya Mtakatifu Athony wa Padua  wamemshukuru waziri huyo  kwa msaada wa komputa hizo ambazo  zitawasaidia katika mosomo na katika kuchapa mitihani yao ya majaribio  kwa wakati.

Mkuu wa shule  hiyo ,Sista Theresia Nanfuka baada ya kupokea msaada huo amemshukuru Naibu waziri  Kwandikwa kwa kutekeleza ahadi yake aliyotoa  alipokuwa mgeni rasmi katika mahafali ya kwanza ya wahitumu wa darasa la saba mwaka 2016.

Sisita Nanfuka  alisema kompyuta hizo ni muhimu  sana kwao zitawasaidia watoto kwenye somo la Tehama na kuwaomba wadau wengine mbalimbali  wenye mapenzi mema kujitokeza kuwasaidia shule yao.